IMG_2477

Diabierna tin competencia di Atletismo Escolar den Stadion


Diabierna dia 21 di november ta tuma lugar den Compleho Deportivo Guillermo Prospero Trinidad na Dakota e competencia di atletismo escolar cu ta programa riba calendario anual di ‘Deporte Escolar’ di IBiSA. Inscripcion di tur atleta, tanto esnan cu ta miembro di un club di atletismo como esnan cu no ta miembro di un club a tuma lugar caba na nan respectivo school. Diabierna atardi prome cu competencia no ta tuma inscripcion mas, solamente ta ‘check in’ (registra) y duna number na tur atleta. Esaki ta cuminsa pa 2’or di merdia te cu 2:45p.m. na Stadion. Mientras cu tur preparacion ta cla pa e competencia cu ta cuminsa diabierna atardi 3’or p.m. Competencia pa atleta No Miembro di Club: E competencia di atletismo escolar ta den diferente categoria pa mucha homber y mucha muher cu ta bay representa nan school. Categoria: A – Naci na 2006 y mas jong; ta participa na e ‘Driekamp’ cu ta encera: sprint 60 meter, distancia largo di 400 meter y tira bala leu, (bala di baseball). B – Naci na 2004 – 2005; ta participa na e ‘Driekamp’ cu ta encera: 60 meter sprint, distancia largo di 400 meter y tira bala leu. C – Naci na 2002 – 2003; Esaki ta e grupo cu ta participa na e ‘Vierkamp’ cu ta encera: 80 meter sprint, distancia largo di 600 meter, tira bala leu y bula leu (verspringen). Competencia pa atleta Miembro di Club: Pa e grupo di atleta aki cu ta representa nan school, tin competencia den diferente categoria pa mucha homber y mucha muher. Categoria: A – Naci na 2006 y mas jong; ta participa na e ‘Driekamp’ cu ta encera: sprint 60 meter, distancia largo di 600 meter y tira bala leu, (bala di baseball). B – Naci na 2004 – 2005; ta participa na e ‘Driekamp’ cu ta encera: 60 meter sprint, distancia largo di 600 meter y tira bala leu. C – Naci na 2002 – 2003; Esaki ta e grupo cu ta participa na e ‘Vierkamp’ cu ta encera: 80 meter sprint, distancia largo di 800 meter, kogelstoten y bula leu, (verspringen). IBiSA ta corda tur mayor pa tene na cuenta cu e actividad di diabierna atardi ta un competencia escolar y no un training. Despues di e competencia, IBiSA ta entrega medaya solamente na e atletanan “Miembro di Club” cu bira ganador den nan categoria.