DSC03123

Departamento di Enseñansa hunto cu Ling & Sons a conscientisa Pius X


Recientemente Ling & Sons hunto cu Departamento di Enseñansa a bishita Pius X School. E motibo di e bishita aki ta pa conscientisa e hobennnan di klas 5 y 6 di e importancia di come saludabel. Mirando cu e cantidad di hobennan cu ta bay scol sin come y e percentahe di obesidad ta halto na e scolnan na Aruba, Departamento di Enseñansa a dicidi di aserca Ling & Sons pa wak si hunto nan por cuminsa cu e conscientisacion di un scol. E idea ta pa den future nan sigui haci e tipo di bishitanan aki na mas scol na nos isla. Meneer di Movecion y Salud, sr. Giovanni Leocadia a trece un presentacion interesante pa dilanti pa educa e muchanan di e importancia di come saludabel. Den e presentacion aki a bin dilanti tipsnan pa siña e muchanan come saludabel. Tambe a bin dilanti cu 30% di muchanan den klas 1 di basisschool tin un problema di sobre peso. Sra. Marlenne Maduro, PR di Ling & Sons a bisa cu pa nan e tawata un shock pa tende cuanto mucha aki na Aruba ta bay scol sin desayuna y cu unabes Departamento di Enseñansa a aserca nan pa sponsor un desayuno saludabel pa un scol nan a dicid di biaha pa duna un man. E mainta aki tambe tawata presente sr. Henry Barrera di klas 6 y sra. Sheila Larzo-Tromp, cabesante di Pius X School. sra. Larzo-Tromp a gradici tanto Ling & Sons hunto cu Departamento di Enseñansa pa e bunita gesto. Sr. Danny Maduro, Presidente di Comision Social di DEA a splica cu e Comision Social semper ta purba organisa varios actividad pa di e forma aki nan por recauda fondo pa un “goede doel”. E aña aki p.e. nan haci un donacion na 8 mucha di menos recurso cu un rugzak cu paña y articulonan di scol. E idea ta pa den futuro Departamento di Enseñansa hunto cu Ling & Sons sigui haci e tipo di bishitanan aki na mas scol na nos isla. Departamento di Enseñansa Aruba kier a gradici Ling & Sons un pa nan bunita aporte na e bunita causa aki. Pa mas informacion por acudi na nos website Enseñansa Aruba | www.ea.aw. Tambe por haya nos riba Facebook na: facebook.com/educationaruba caminda regularmente nos ta publica informacion nobo.