Den Futbol Escolar organisa pa IBiSA: International School of Aruba ta titula Campeon den categoria B-mucha muher

Diaranson atardi a tuma lugar e weganan di final nacional den futbol di ‘Deporte Escolar’ organisa pa Instituto Biba Saludabel y Activo, IBiSA. E competencia escolar tabata den categoria B-mucha muher y e schoolnan di Enseñansa Basico a presenta cu nan ekipo di mucha muher pa defende nan school. Tur wega a bay den bon ambiente y tabata interesante pa mira. E schoolnan a conta cu apoyo di nan fanatico cu tabata presente den tribuna. E prome wega di diaranson atardi a bay entre St. Anna School y Colegio Pastoor Kranwinkel. Esaki a resulta den un wega hopi emocionante, unda ambos school a bataya te na final pa logra e victoria cu ta duna nan e pase pa e wega final pa campeon. Tabata e muchanan di St. Anna School cu a sa di demostra e animo anotando dos gol y ta gana e wega cu score di 2 pa 1. E golnan di St. Anna School a wordo anota pa Daphne v/d Hoorn (1) y Minguelina Werlelman (1), mientras cu pa Colegio Pastoor Kranwinkel ta anota su unico gol e hobencita Sheryenne Loefstok. Pa e di dos wega ta subi tereno e muchanan di International School of Aruba y esnan di Mon Plaisir School. E ekipo di International School a subi tereno decidido y den un forma convincente ta gana e wega aki cu score di 5 pa 0. Goleador di International School of Aruba ta resulta e hobencita Enzy Broussard cu 4 gol, mientras cu e otro gol ta keda anota pa Sharda Delgado. E resultado di e dos prome weganan ta duna como ganador St. Anna School y International School of Aruba, cu ta e schoolnan cu mester bataya pa e titulo di campeon. Wega pa di tres y cuater lugar: E di tres wega di atardi tabata pa defini e di tres y cuater lugar den futbol categoria B- mucha muher. Aki a midi forsa e muchanan di Colegio Pastoor Kranwinkel y esnan di Mon Plaisir School. Despues di e tempo reglamentario di wega, esaki ta keda empata na 0 gol. Siguientemente a pasa pa tironan penal cu a resulta emocionante pa ambos school y nan fanatico. Aki ta unda cu e muchanan di Mon Plaisir School ta destaca anotando e tironan penal y ta logra gana 5 pa 4. Di e forma aki Mon Plaisir School ta finalisa na di tres lugar y cada integrante ta ricibi nan medaya na final di e wega. Wega pa Campeon: E ultimo wega tabata pa e titulo di campeon den futbol escolar categoria B-mucha muher y aki ta unda St. Anna School ta subi tereno pa enfrenta International School of Aruba. Cu bastante rapidez e muchanan di International School of Aruba tabata move riba tereno y tabata tin e control di e bala. Golnan a cuminsa cay y aki ta momento cu e muchanan di International School a sinti e confiansa y dominio di e wega, cu na final nan ta gana tambe. E score final a keda 7 pa 0. E golnan di International School of Aruba a wordo anota pa Enzy Broussard (4), mientras cu Jony Broussard ta anota 3 gol. International School of Aruba ta titula campeon den futbol escolar categoria B-mucha muher y na di dos lugar ta keda St. Anna School. Ambos ekipo a ricibi nan respectivo medaya, mientras cu International School of Aruba ta haya e ‘Copa Rotativo di Campeon’. Pa un reportahe di potret por bay riba IBiSA su Facebook y tambe riba website www.ibisaruba.org . IBiSA ta gradici e refereenan Rosemin Croes, Marisela Werleman, Jeanira Croes y Sjurendy Granviel pa nan aporte y contribucion na bon desaroyo y resultado di e weganan di futbol escolar den e categoria aki pa mucha muhernan. Alabes ta felicita tur school cu a participa na e competencia di futbol, specialmente e ganadornan. IBiSA ta motiva tur school pa sigui participa na e competencianan di deporte escolar cu tin riba calendario di deporte pa aña escolar 2014-