Arion Wine Company recientemente tabatin e honor di ricibi Luis Torres, Director di Wine Education East pa e Constellation Academy of Wine. Torres a duna varios seminario informativo y entretenido tocante e combinacion di cuminda y biña, titula “E Liberacion di Cuminda y Biña.”
E prome seminario, na Hyatt Regency Aruba Resort Spa & Casino, a inclui un total di 85 participante di e industria di cuminda y bebida riba e isla. Nan a disfruta di e oportunidad di purba biñanan cu ta cai bou di e bandera di Constellation Brands, cuminsando cu un variedad di biña blanco cu a inclui Kim Crawford Sauvignon Blanc, Relax Riesling y Estancia Chardonnay, sigui pa biñanan cora; Estancia Pinot Noir, Ravenswood Zinfandel “Old Vine,” Franciscan Estate Cabernet Sauvignon, y terminando cu un Fiorini Moscato dushi y burbujante. Cada biña a wordo combina cu cuminda of un ingrediente specifico, cual a varia di Salt & Vinegar Chips pa Saus Dushi di BBQ, mientras cu Torres a educa nan riba algun di e cumindanan mas importante pa scohe cu ta fungi como un “brug” ora di bebe biña.
E di dos seminario a wordo ofreci na 25 studiante y miembro di e facultad di Estudio di Maneho di Hospitalidad y Turismo na e Universidad di Aruba. Ademas di disfruta di e combinacionnan di cuminda y biña, nan a siña tambe tocante e diferencianan entre custumbernan di come na Europa y na Merca, e cinco yabinan di biña: esta e acido, sucu, alcohol, oak y tannin; y e tres yabinan di cuminda: ingrediente, metodo di produccion y saus/condimento ademas di e platonan acompañante.
Un orador dinamico y anima, Torres tin experencia extensivo den e suministro y distribucion di biña y a studia Tecnologia di Cuminda y Sciencia, ademas di tin 15 aña di experencia den e industria di restaurant, unda el a haci un stage na Charlie Trotter’s cu Master Sommelier Larry Stone, y a studia cu e Court of Master Sommeliers y The Wine and Spirits Education Trust.
Na final di ambos seminario, tur hende a ricibi un certificado anunciando nan conocemento mas amplio di combinacionnan di cuminda y biña. Riba e portretnan por mira e participantenan disfrutando di e seminarionan cu a wordo ofreci pa Luis Torres y Arion Wine Company.
