CONTROL DI TASKFORCE TUMANDO LUGA Y TA LANSA PROGRAMA DI MYSTERY SHOPPERS

ORANJESTAD – Desde inicio di e programa di e Aruba Health & Happiness Code, mas cu 2.500 compania a registra pa e seyo di color. Den transcurso di e ultimo lunanan, departmento di Salud Publico a controla y inspecciona un cantidad di compania cu e seyo di color. A otorga a base di esaki e seyo di oro na un total di 616 establecimento, principalmente den e sectornan di F&B, supermercado y tienda. Oficina di turismo conhuntamente cu DVG ta duna un palabra di elogio na tur establecimento cu ta cumpli cu e protocolnan, esaki sigur lo yuda Aruba den e lucha pa reduci e nivel di contagio actual di COVID-19.   Mester enfatisa cu algun establecimento lastimamente a perde nan seyo di color pa falta di cumplimento cu e protocolnan manera stipula. E establecimentonan aki lo mester re-aplica prome cu por sigui e trayectoria. Oficina di turismo conhuntamente cu DVG lo sigui sali na vanguardia di e protocolnan stipula pa asina por brinda e miho oportunidad como pais pa sali di e situacion precario aki.   Procotolnan cu ta na vigor actualmente ta inclui:

• Haci uzo di hand-sanitizer of laba man frecuente
• Uzo di tapa boca pa bishitante como tambe coleganan trahando hunto
• No mag di tin mas cu cuater adulto aglomerando
• Mantene un logboek di limpiesa.

Nos ta pidi e establecimentonan nan cooperacion pa mantene nan mes na e protocolnan stipula.   Den futuro cercano, lo cuminsa cu control y inspeccion di e otro sectornan cu ta cay bou di e programa di Aruba Health & Happiness Code, pues un yamada na tur establecimiento pa ta prepara pa esaki.   Tambe establecimentonan lo wordo bishita door di mystery shoppers pa asina por controla pa cu e cumplimento di e protocolnan continuamente. Si tuma nota cu no ta cumpli manera debe ser, e establecimiento por core e risico di wordo cera, haya un multa como tambe wordo exclui di e programa di Aruba Health & Happiness Code.   Aruba Health & Happiness Code, lo introduci un campaña den area turistico pa asina promove companianan liga na e programa aki.   Pa e companianan cu a ricibi un bishita di taskforce y of DVG y ta cla pa ricibi e seyo di Oro di Aruba Health & Happiness Code, pone atencion na bo e-mail pa confirmacion di esaki.