Dienst Technische Inspecties ta anuncia cu den e “Normal nobo” cu e afdeling Veiligheidsinspectie lo sigui cu su inspeccion y controlnan riba projectonan di construccion pa por sigui garantisa e seguridad. Afdeling Veiligheidsinspectie en onderzoek (VI&O) ta wak primordialmente e seguridad di e trahador na pia di trabou. Durante DTI su bishita na e lugar di construccion, hopi biaha e compania of trahado no ta cumpli cu tur e reglanan di seguridad
existente. Adhunto un par di conseho y observacion pa tur trahado of compania cu a cuminsa bek den construcción lo siguiente:
Algun peligernan pa tene cuenta cune durante un construccion ta:
- Trabou di haltura;
- Machine cu ta draai;
- Coriente;
- Material cu por cai of sali bula;
- No haci uzo di proteccion personal (PPE’s).
Ta importante pa tur stelashi :
- a) wordo arma manera fabrica ta prescribi cu tur dos sker pa stabilidad y cu e stelashi ta den un bon condicion.
- b) pia nan ta nivela riba vloer y ta bon ahusta.
- c) despues di 3 element e mester wordo ankla na e structura of geschoor pa stabilidad.
- d) plankinan di 60 – 80 cm pa para riba dje, toaboard y cu leuning pa lomba.
- e) tur planki mester tin un stop (klos) bow di dje pa evita pa e planki sali cay for di e stalashi y mester ta claba na otro.
- f) stelashi cu ta mas halto cu e edificio mester wordo geaard pa bliksem.
- g) trahado nan mester tin nan safety harnass na tur momento bisti y mara na e stelashi.
- h) trahado no mag di mara su mes na e sker nan di e stelashi pero na e structura cu ta stabil y por absorba e caida.
Pa trapi di
metal:
- a) e trapi ta wordo uza pa bai di un luga pa otro, y no pa traha riba dje.
- b) e trapi mester steek uit 1 meter.
- c) e trapi mester wordo bon segura, pa evita e slip.
- d) e trapi ta den bon condicion.
- e) e trapi no mag di “buig” haya un barica ora di subi e trapi.
- f) e trapi no mester wordo poni riba un angulo skerpi of stijl.
Pa trapi di
palo:
- a) e material mester ta den bon calidad, e liña di e palo mester ta den su largura (“rechtdradig”).
- b) e trapi mester wordo contrui sigun normanan. Uzando klos of “inkeping”, distancia di e trede (paso) 25 cm. Usa 2×4 pa trede (paso), e pia nan mester tin bon grip ora para riba dje.
Pa balkon of opening/buraconan den vloer:
- a) vloer opening mester ta afgezet of tapa.
- b) e piso completo mester tin baricada pa evita e peliger di caida di personanan.
- c) mester buta aviso cu indicacion di peliger di caida.
- d) trahadornan mester tin safety harnass na tur momento bisti y mara ora cu ta traha serca di e rand.
Pa machine cu ta draai:
- a) mester tin su capa di proteccion riba e machine.
- b) zaagmachine of grinder (“aan/uit knop”) mester ta traha.
- c) machine cu ta den mal condicion mester wordo saka for di di uzo.
- d) kabel di coriente no mag di ta pela of gelast na otro.
- e) usa proteccion personal adecua ora ta opera e machine.
Extension Cord y cashi coriente:
- a) extension cord cu ta den mal condicion mester wordo saka for di uso.
- b) purba usa extension cord cu ground.
- c) cashi di coriente mester tin su tapa.
- d) tur stopcontact mester tin su tapa.
- e) cashi di breaker mester tin un hoofdschakelaar, ground y ta den un bon condicion.
- f) verlengsnoer cu mas cu 3 verbinding mester wordo saca for di servicio.
Puntonan general:
- a) riba piso unda ta traha mester un baricada y cu su toeboard.
- b) no lanta material cu no ta wordo mara adecua.
- c) no ta cana bou di un grua ora cu e ta lantando of pasando material den halto.
- d) mester pone atencion ora ta cana banda di hende cu ta cortando of welder.
- e) tene cuenta tur ora pa loke ta pasa rond di bo persona.
Uso di proteccion personal (PPE’s):
- a) den construccion mester bisti un veiligheidshelm/safety helm.
- b) no ta permiti pa usa un “bumb caps” manera un veiligheidshelm (“hard hat”) den construccion.
- c) mester bisti sapato di seguridad prome cu drenta den construccion (safety shoes).
- d) mester usa e proteccion adecua pa cada trabou.
- e) na entrada di construccion mester tin e regla nan di seguridad y e proteccion nan cu tur trahado mester uza.
IMPORTANTE: Riba tur projecto mester tin suficiente baño pa trahador y dividi na sexo. E baño mester wordo hasi limpi tur dia. Pa mantene hygiëna mester tin e facilidad disponibel pa laba e man.
Pa trahador nan cu ta break na trabou mester tin un mesa cu un afdak pa proteha di solo y awa limpi pa bebe.
Por manda pregunta via nos email
dti@setarnet.aw y Facebook page: Dienst Technische Inspecties. Por yama pa información na :
Tel: 5845300.
Nos ta pidi pa sigui e instruccionnan di DVG y e Task Force encarga pa controla e rekisitonan en conexion cu COVID-19.
SEGURIDAD NA PROME LUGAR! 
