E calendario di competencia den ‘Deporte Escolar’ organisa pa IBiSA ta continua cu e disciplina
di Futbol di Sala pa e schoolnan di Enseñansa Avansa. Tur wega ta tuma lugar den Centro
Deportivo Libertador Betico Croes na Sta. Cruz y ta cuminsa pa 3’or di atardi.
Futbol di Sala ta un deporte hopi gusta entre e hobennan di schoolnan secundario. Como tal e
competencia organisa pa IBiSA ta conta cu un participacion grandi di e schoolnan di Enseñansa
Avansa den diferente sector riba nos isla.
Sector Oranjestad:
E schoolnan di sector di Oranjestad ta: Colegio Arubano, Maria College, Colegio San Antonio, y
Juliana School.
Den e prome wega ta midi forsa Colegio Arubano y Maria College, na unda cu hobennan di
ambos school ta sali fuerte y den prome tempo di wega esaki ta keda empata 2-2. Den e di
dos tempo di wega, Maria College ta probecha di oportunidadnan cu ta presenta y ta anota y ta
bay ariba dominando e wega. E score final ta keda 5 pa 3 na fabor di Maria College. Pa Maria
College ta anota Jean Marc Farro (2), Keano Maduro (2) y Adrian Koolman (1), mientras cu pa
Colegio Arubano e golnan anota ta di Jason Fontalvo (1), Chris Leung (1) y Akeem Charles (1).
E di dos wega tabata entre Colegio San Antonio y Maria College. Un biaha mas e hobennan
di Maria Collega ta demostra superioridad y dominio total y ta gana e wega cu score di 8 pa 2.
Golnan anota pa Maria College tabata di Jean Claude Farro (3), Jean Pierre v/d Linde (2), Jean
Marc Farro (1), Keano Maduro (1) y Michael Molinares (1). Pa Colegio San Antonio ta anota
Carl Geerman (1) y Lyonell Briesen (1).
E di tres wega a keda hunga entre Colegio Arubano y Juliana School. Ambos school ta parti
punto, pues e wega ta keda empata na 2. Golnan anota di Colegio Arubano tabata na encargo di
Chris Leung (1) y Akeem Charles (1). Mientras cu pa Juliana School ta anota Denrick Lopez (1)
y Andres Villamarin (1).
Clasificacion Sector Oranjestad:
E weganan a continua pa dicidi cua ta e schoolnan cu ta clasifica pa e sector di Oranjestad.
Colegio San Antonio ta subi cancha pa enfrenta Colegio Arubano. Den e prome mita di wega,
esaki a bay hopi pareu y ta caba cu un gol pa banda. Pero den e di dos mita di wega, Colegio
Arubano ta sali fuerte y ta anota su golnan pa gana e wega. E score final ta keda 3 pa 1 y e
golnan anota pa Colegio Arubano tabata di Akeem Charles (2) y Chris Leung (1). E gol anota pa
Colegio San Antonio tabata di Jesus Peñate (1).
Maria College ta topa cu Juliana School riba cancha. Cu un control total y pasenan exacto, e
hobennan di Maria College tabata sa di yega na e gol, dominando e wega di tal forma y nan ta
bay cu e victoria cu anotacion di 8 gol contra 1 di Juliana School. Pa Maria College ta anota
Jean Pierre v/d Linde (6), Jean Claude Farro (1) y Adrian Koolman (1). E gol di Juliana School a
wordo anota pa David Castro (1).
E ultimo wega pa e sector aki tabata entre Colegio San Antonio y Juliana School. E wega aki
tabatin hopi emocion y di ambos banda tabata trata di yega mas cerca di gol. E hobennan di
Colegio San Antonio a probecha di cada ocacion y ta anota, mientras cu esnan di Juliana School
a sigui cu nan intento pero na final no ta logra. E score final ta keda 9 pa 3 na fabor di Colegio
San Antonio cu golnan anota pa Jesus Peñate (4), Carl Geerman (3), Richinell Lioe-A-Tjam (1) y
Raul Morales (1). Pa Juliana School ta anota Moises Castro (2) y Andres Villamarin (1).
E schoolnan cu ta clasifica den Poule B pa e sector aki ta bira: Maria College na prome lugar y
Colegio Arubano Oranjestad na di dos lugar.
E weganan di Futbol di Sala entre e schoolnan di Enseñansa Avansa ta continua durante siman,
mientras cu e final nacional ta tuma lugar diasabra 28 di februari 2015 den oranan di mainta na
Centro Deportivo Libertador Betico Croes na Sta. Cruz.
E school cu titula campeon nacional den Futbol di Sala ta representa Aruba den e ‘Weganan
Interinsular 2015’ cu ta tuma lugar e fin di siman di 27 pa 29 di maart 2015 na isla di Boneiro.
