Diadomingo 31 di Mei Comishon Grot di Lourdes a organisa un tremendo actividad pa asina recauda fondonan necesario pa construcion di un runway pa rolstoel por subi te ariba mas cerca di e altar y imagen di Mama Maria. E celebracion a cuminsa pa 6or di atardi cu un misa na honor di e Señora di tur Pueblo ofreci door di pastoor Juancho y tambe pastoor Wilmer y despues di e santo sacrificio di misa a sigui un concierto di gospel ofreci pa e muchanan di Youth Heart Ministry. Un publico basta grandi a haci acto di presencia pa asina a sigui e santo sacrificio di Misa y despues tur hende a baha na e parti mas abao pa asina celebra y alaba na Señor. Durante di e concierto esnan presente por a disfruta di un bar y cushina bon surti y tambe por a haci nan donacion pa e bunita causa pa cual e actividad a wordo organisa. Hopi ta esnan cu a comenta cu un actividad asina lo mester wordo ripiti paso e tabata algo unico y hopi bunita mei mei di e barancanan na Grot di Lourdes. E Comishon Grot di Lourdes a traha basta duro pa algun luna pa asina por a pone henter e actividad den otro pero na final di e anochi nan tabata masha contento cu e asistencia di publico y e sosten y palabranan di elogio cu nan a hanja pa cu e actividad. Nan kier a gradici tur esnan cu a contribui grandemente cu e actividad, tur e voluntarionan, pastoornan di Parokia di San Nicolas, Cuerpo Policial y e muchanan di Youth Heart Ministry cu a duna un tremendo presentacion riba e anochi aki y sin laga afor na tur e bisinjanan pa nan pasenchi y comprencion durante cu e caminda a keda sera pa traffico pa asina e actividad aki por a tuma lugar. Awor e trabaonan lo continua riba e runway pa rolstoel y lo sigui informa na tur hende con esakinan ta andando.
