Nos ta den e siman final di Olimpiada Escolar 2014 organisa pa IBiSA, y den diferente disciplina
di deporte e weganan final ta tumando lugar. Den Centro Deportivo Libertador Betico Croes na
Sta. Cruz, e schoolnan di Enseñansa Avansa cu a clasifica pa final den volleyball mucha muher a
enfrenta otro pa mira cua ta e school cu ta titula campeon.
E schoolnan cu a pasa pa hunga ta: EPB San Nicolas, Colegio San Nicolas y John Wesley
College tambe di San Nicolas. Den e prome wega a enfrenta otro John Wesley College y EPB
San Nicolas, cual wega a resulta yen di accion y emocion cu a bay ful 3 set. E prome set tabata
25-20 na fabor di EPB San Nicolaas. Den e di dos set, e hobennan di John Wesley College ta
reacciona y ta gana cu e score di 25 pa 23. Den e ultimo set ambos school a duna lo maximo pero
tabata EPB San Nicolas ta logra e victoria cu score di 15 pa 12.
E di dos wega a bay entre Colegio San Nicolas y John Wesley College, cual wega a bay
relativamente rapido. Den dos set sigui e hobennan di Colegio San Nicolas ta logra gana cu score
di 25-8 y 25-13, di forma cu nan ta pasa pa hunga e ultimo wega pa e titulo di campeon.
Colegio San Nicolas tin varios aña ta logra e titulo di campeon den volleyball mucha muher,
tanto durante e campeonato regular di ‘Deporte Escolar’, den e competencia ‘Interinsular’ pero
tambe durante ‘Olimpiada Escolar’.
E wega decisivo tabata entre e hobennan di EPB San Nicolas y esnan di Colegio San Nicolas.
Ambos school a duna un tremendo bataya riba cancha, dunando e wega hopi accion y emocion.
Finalmente ta e hobennan di Colegio San Nicolas ta sobresali y ta gana den dos set sigui cu
scorenan di 25-16 y 25-12. Cantando di alegria Colegio San Nicolas ta celebra otro victoria y un
titulo mas riba nan nomber.
Den e competencia di volleyball mucha muher den ‘Olimpiada Escolar 2014’ pa schoolnan
di Enseñansa Avansa ta keda na di tres lugar John Wesley College y e hobennan ta ricibi nan
medaya y trofeo. Mientras cu na di dos lugar ta finalisa EPB San Nicolas, cu tambe a ricibi nan
medaya di plata y nan trofeo como sub-campeon. E titulo di campeon a bay indiscutiblemente pa
e hobennan di Colegio San Nicolas cu ta ricibi nan medaya di oro y e trofeo di campeon.
