club kibrahacha

Club Kibrahacha 60+ tambe tabata on cu Aruba Doet


No tin nada mas bunita y satisfactorio ora cu bo por haci algo di curason pa un otro persona y cu e otro persona aki no solamente ta aprecia e gesto aki, pero cu tambe e ta gosa di dje.
Esaki a sucede durante Aruba Doet cu Club Kibrahacha 60+, caminda pa di dos aña consecutivo 10 boluntario di Mary Joan foundation conhunto cu 20 boluntario di Club Kibrahacha 60+ a bolbe organisa un actividad special pa e miembronan di Club Kibrahacha 60+. E biaha aki den forma di un dushi bustrip.
Ya pa 7:30 di mainta tur boluntario tabata tey presente na Club Kibrahacha 60+ pa di e manera ey cuminsa cu e preparacionnan neceario pa cu e mainta special aki. Pa 9:30 tur e 140 miembro participante tabata presente y cla sinta den bus pa asina e trip por cuminsa. Den un caravana di 4 bus di Arubus e recorido di Aruba a cuminsa. A pasa Ayo Rock Formation, Natural Bridge, Kapel di Alto Vista, Faro, despues a tuma e caminda via hotelnan, Linear Park, rotonde dilanti aeropuerto y a caba bek na Club Kibrahacha 60+. Un mainta seguramente hopi placentero pa e miembronan como tambe pa e boluntarionan. E ambiente tabata formidabel, caminda a combersa, intercambia idea, repasa algun bon storia di antes y a canta na smaak. Diferente miembro a aprecia e oportunidad di por a wak luganan di Aruba cu nan tin hopi tempo sin bishita, un di nan sigur ta e kapel di Alto Vista.
Club Kibrahacha 60+ ta desea di gradici e organisadonan, CEDE y Oranjefonds, di Aruba Doet pa e gran proyecto aki y pa a brinda e miembronan di Club Kibrahacha 60+ e posibilidad di participa cu un bunita actividad y ta spera cu Aruba Doet lo tey pa keda pa hopi anja mas. Alabes ta desea di gradici tur e boluntarionan di e mainta aki, di Mary Joan Foundation y di Club Kibrahacha 60+ mes, pa nan entusiasmo y motivacion pa duna nan tempo liber pa traha pa un bon causa. Tambe Club Kibrahacha 60+ ta desea di gradici Arubus pa a pone 4 bus disponibel y pa a brinda un servicio sublime. “Last but not least”, Club Kibrahacha 60+ ta desea di gradici tur su miembronan cu a participa cu e bustrip aki. Boso tabata merec’e. Nos ta spera di por sigui ofrece boso e servicio y e extra actividadnan. Boso a duna hopi caba pa Aruba, awor ta na nos pa por ofrece boso locual nos por, pa asina boso por sigui disfruta di boso etapa den bida di 60+.
Club Kibrahacha 60+ ta un club specialmente pa tur 60plussers di Aruba. Di dialuna pa diabierna ta ofrece diferente servicio y actividad manera Move cu Femmie, Dance Fit, Chi Cu Cha, Energietraining, Yoga, Smovey y Thera Fit. Tambe tin den cura un Yalp disponibel pa haci diferente ehercicio. Tin un Internet Café cu WiFi, caminda tambe por tuma les di uzo di computer. Tin posibilidad pa haci obra di man, tuma les di pintura, ta organisa regularmente diferente actividad y hopi mas. Den caso cu no tin transporte, Club Kibrahacha 60+ por ofrece e servicio aki. Cu un pago mensual di solamente Awg 25,- pa persona, por haci uzo di tur e posibilidadnan cu Club Kibrahacha 60+ ta ofrece.
Pa mas informacion por tuma contacto via number di telefon 582-8159 of por pasa personalmente na Piedra Plat 23. Por bishita tambe website di Club Kibrahacha 60+ of “like” nos pagina di Facebook.

Leave a Comment