Celebracion di Dia di Mama y Dia di Tata di Club Kibrahacha 60+


Tur dia ta Dia di Mama y Dia di Tata na Club Kibrahacha 60+, pero un bes pa aña Club Kibrahacha

60+ ta celebra e dianan aki extra special. Manera ya caba ta un tradicion, tur mama y tata di Club

Kibrahacha 60+ tabata invitadonan di honor na Manchebo Beach Resort, caminda a organisa un

celebracion di kita sombre. Den un ambiente sumamente dushi, cu bista pa e bunita lama di Aruba,

e team dinamico y cordial di Manchebo Beach Resort conhuntamente cu e boluntarionan di Club

Kibrahacha 60+ a haci nan maximo esfuerso pa tur miembro di Club Kibrahacha 60+ pasa algun

oranan inolvidabel.

E mainta a cuminsa cu palabranan di bonbini di parti di e coordinador di Club Kibrahacha 60+,

esta Sra. Diana Uchtmann, sigui pa un bunita y inspirativo oracion di parti di boluntario di Club

Kibrahacha 60+, Sra. Juliana Henricus. Boluntario Romo Fingal a fungi como MC. Tur hende a

disfruta di koffie cu pasa boca y mas laat nan por a saboria un dushi lunch, consistiendo di sopi, sigui

pa un sublime plato di pisca y stoba di carni, y a termina cu bolo. Nan a baila, canta, combersa y gosa

masha hopi mes. Boluntarionan di Club Kibrahacha 60+ a traha un bunita corsage pa tur participante.

Tabata tin diferente “doorprices” y na final tur participante a ricibi un bunita rosa.

Tur invitado por a gosa di un variedad di musica. Boluntario Sra. Agaath van Vliet e deleita tur

presente cu dos bunita cancion. Tur hende por a gosa y baila riba tononan di musica di cah’i orgel di

Sr. Nelson Sprok y di e conhunto di Sr. Tommy & Friends. E mainta aki tambe tabata tin e estreno di

“Grupo Kibrahacha” un conhunto consistiendo di miembro- y boluntarionan di Club Kibrahacha 60+

mes. Nan a “haci un cos”! Pista di baile tabata yen. Un danki di curason pa boso contribucion.

Durante e celebracion a ricibi tambe bishita di sorpresa di Prome Minister di Aruba, Sr. Mike Eman.

Seguramente un bunita gesto. Club Kibrahacha 60+ ta aprecia cu Sr. Eman a tuma su tempo pa pasa

na cada mesa y comunica y duna atencion na e miembronan. Nos tur mester para keto na e hecho cu

nos pensionadonan ta esnan cu a yuda construi nos comunidad. Nan contribucion tabata y ainda ta

enorme pa nos pais. Nan seguramente ta merece nos duna nan e debido atencion y gratitud. Directiva,

empleadonan y boluntarionan di Club Kibrahacha 60+ ta sinta nan mes honra cu nan por duna nan

aporta pa cu esaki.

E celebracion no por tabata completo sin e eligimento di mama y tata di aña. Mama di Aña di Club

Kibrahacha 60+ a keda den nomber di Sra. Mary Logan y Tata di Aña di Club Kibrahacha 60+ a

keda den nomber di Sr. Cesar Kip. Tambe a scoge e Mama di Aña bou di e boluntarionan y a keda

den nomber di Sra.Filomena Orman.

Club Kibrahacha 60+ ta gradici un y tur cu a contribui pa cu e mainta dushi aki. Gradicimento

special ta bay na e GM Sr. Ton Kolman y e team dinamico di Manchebo Beach Resort y na tur

e miembronan di Club Kibrahacha 60+ pa nan participacion activo y pa nan aprecio pa cu e

celebracion aki.

Bo tambe ta desea di forma parti di e famia dushi y activo Club Kibrahacha 60+? Bo tin sesenta

aña of mas? No perde mas tempo, tuma contact mas pronto posibel cu Club Kibrahacha na number

di telefon 582-8159 of pasa personalmente na Piedra Plat 23. Tambe por bishita nos website of

“facebook page”.

This is image placeholder, edit your page to replace it.