Casa Tua ta celebra diez aña di excelencia

Na honor di e restaurant su di 10 aniversario, e alumnonan di EPB cu ta studiando den e direccion culinario profesional basico a disfruta di un evento special na Casa Tua, Renaissance Marketplace. Binti-un top studiante a wordo invita pa un tayer casual di traha pizza hunto cu e chefnan experto di Casa Tua, BIBO den e restaurant su cushina di exhibicion. Nan publico, esta amigonan y fanaticonan di Casa Tua, incluyendo e isla su Minister di Educacion, miembronan di prensa y dignitarionan, tabatin e oportunidad pa disfruta di nan pizza gourmet fresco traha como nan lunch, y nan a declara e pizzanan increiblemente delicioso. Rumannan David & Gregory Nataf, kendenan ta maneha e negoshi di nan famia, a dicidi di celebra nan aniversario door di tene un evento culinario, envolviendo e isla su futuro chefnan. Nan a invita e studiantenan y nan maestronan, proveendo nan tambe cu e transportacion pa y di e restaurant. Na final di e experiencia dibertido y educacional, nan a primintidi duna un contribucion na e scol su sala di media, den e forma di materialnan di estudio. Esaki tabata e restaurant su manera di sostene educacion y desaroyo culinario, yudando pa lanta y cria talentonan localdi cushina. E famia Nataf ta doño di dos restaurant di Casa Tua riba e isla, y tin raiznan culinario den e parti zuid di Francia, esta Provence, cual ta e famoso region situa entre e Alps Frances y e Riviera Frances. Tabata aki cu na 1961, den e pueblo chikito y pintoresco di Montpellier, Michel Nataf, e prome di cuater ruman Nataf di prome generacion, a wordo introduci na e secretonan di un thin-crust pizza ora el a bira e ayudante di e Maestro di Pizza, un Italiano Siciliano cu a haci un nomber pa su mes trahando un pizza al estilo revolucionario. Michel a siña su ruman Victor y Victor a siña e otro ruman, Serge, y despues nan unico ruman muhe Monique a agrega su mesun influencianan Frances, Spaño y Italiano, ademas di algun di e recetanan di famia for di e Mediteraneo. Y voila, den e tempo cu a pasa e famia Nataf a opera te cu 10 restaurant, na Francia y den Caribe, unda nan a muda pa habri establecimentonan moderno, dos na Corsow y dos na Aruba. E di dos generacion, esta Victor su dos yiu hombernan Gregory y David, practicamente a lanta den e cushina y a bira e mentenan creativo tras di Casa Tua, cual traduci literalmente ta nifica ‘bo cas, ’ y ambos restaurant ta sirbi e thin-crust pizza cu awo ta famoso, den nan mesun ambiente unico. Mientras cu e forno di bloki ta siguo cushina e pizza, bishitantenan ta saborea pastanan traha na e restaurant mes y recetanan clasico di Spaña y Italia manera Osso Bucco di Vittelo, Beef Carpaccio, Paella y Tiramisu, den airco of dem aire liber. Pa lunch, cena, bebida y pasapalo, Casa Tua ta bo cas, y e empleadonan bon entreni ta contento pa sirbi bo na un manera elegante, y cu un sonrisa.