Tur luna, Caribbean Queen na Palm Beach Plaza Mall ta honra un artista femenino local cu ta biba y crea riba e isla. E programa di Reina Caribense a wordo lansa ora e tienda a habri na fin di 2011. Pa e luna di Juni 2014, un artista local, Gloria Feliciana, ta e Reina Caribense celebra na e pacus, demostrando su arte pa hende local y turista por admira y cumpra.
Como un mucha den su ciudad natal stima di Salta, Argentina, Gloria a haya su mes atrai na obranan di arte y moda. Como un hoben, el a crea paña, faha, cartera, camisa pisa pa winter, y topnan di crochet pa zomer, tambe modificando paña prêt-a-porte pa crea su mesun estilo.
E no a sigui cualkier tipo di curso formal di arte, sino el a completa su educacion den un area completamente diferente, graduando como un analista di sistema y trahando despues como un profesional den IT.
El a bin Aruba despues di a cuminsa su bunita storia di amor 12 aña pasa. El a casa akinan y a duna luz na dos yiu homber, Mark (4) y Frank (10). El a habri su mesun negoshi exitosamente, trahando cu computer, 10 aña pasa.
E aña aki el a dicidi pa seriamente sigui tras di e desaroyo di joyas traha na man, despues di e participa den un tayer di diseño di moda na Ateliers ’89 na Oktober 2012. Durante 2013, el a busca informacion, siña y practica tecnicanan nobo y a descubri porcelana frieu, un medio accesibel cu cual e por a crea su piesanan unico di joyas traha na man. Su imaginacion a cuminsa expande mientras cu e tabata hunga cu color y forma, cual el a gosa sumamente hopi di dje.
Gloria ta raporta cu, mas cu tur cos, e ta gusta traha kralchi, y aunke cu su material faborito ta porcelana frieu, e ta usa tambe tela, foil di aluminio, palo, cuero, cocolishi y glas di e lama rond di Aruba.
Gloria ta pasa hopi bon trahando su joyas na man, y e momento cu e caba cu un piesa, mas idea ya caba ta formando den su cabes. Den su coleccion, cada piesa ta diseña y crea cu hopi pasenshi, ultimamente reflehando su mesun estilo, cual e ta defini como femenino, delicado, sofistica, clasico y alegre. Exclusivo y moderno, e piesanan ta diseña pa pone hende muhe sinti nan mes special, y bo por bisti nan den dia of anochi. Gloria ta haya e reto di mehora su obranan hopi excitante.
Contento di ta e Reina Caribense di mas nobo, Gloria lo ta demostrando su obranan durante henter e luna di Juni na Caribbean Queen, Palm Beach Plaza Mall.
Caribbean Queen ta dedica un porcentahe di tur benta na su programa di Tikkun Olam
(Reparacion di Mundo). E fondonan colecta ta wordo parti tur cuartal entre organisacionnan caritativo, como parti di un esfuerso continuo pa haci algo bon y sirbi e comunidad. Tur e fundacionnan cu ta ricibi donacionnan di Caribbean Queen ta dedica na e promocion di arte riba e isla y educacion di artesania.
