Campaña di Vacunacion Escolar a cuminsa atrobe


Importante pa muchanan keda proteha contra malesanan contagioso

ORANJESTAD, Aruba – 11 november 2020: Manera tur aña campaña di vacunacion escolar tey atrobe. Seccion Cuido Salud Hubenil (JGZ) di Departamento Salud Publico (DVG) actualmente ta pasando tur scol preparatorio, basico y special pa ofrece vacuna na cierto grupo di mucha segun e programa di vacunacion nacional. Durante pandemia di coronavirus ta importante pa keda vacuna muchanan pa asina evita cu otro malesanan contagioso por lanta cabes. Aki ta referi na e vacuna ‘DKTP’ contra difteria, kinkhoest, tetanus y polio y ‘MMR’ contra cacheton, sarampi y sarampi Aleman. Tambe lo ofrece vacuna ‘HPV’ contra e virus papiloma humano cu por causa cancer na boca di matris.

Cinco grupo di mucha ta bin na remarca pa un of mas vacuna:

Grupo Vacuna
Muchanan di scol preparatorio naci te cu 2015 DKTP / MMR
Muchanan den klas 1 di scol basico DKTP / MMR
Muchanan den klas 5 di scol basico DKTP / MMR
Muchanan naci na 2010 di scol special DKTP / MMR
Mucha muhenan den klas 6 di scol basico y special HPV

 

Mayornan cu tin yiu den un di e gruponan menciona lo ricibi un carta cu mas informacion via scol si en caso e mucha falta vacuna segun registracion na DVG. Den e carta lo specifica cua vacuna e mucha falta y lo pidi permiso di mayor pa vacuna e mucha na scol. Si tin e buki geel di vacunacion por manda esaki hunto cu e carta di permiso y lo nota esaki den e buki. Si no tin e buki mas, e mucha lo haya un otro comprobante di vacunacion. Seccion Cuido Salud Hubenil ta traha conhuntamente cu Wit Gele Kruis y tin record di vacunacion di tur mucha digitalisa. Asina por garantisa cu tur mucha ta proteha debidamente.

Tur mucha tin derecho pa crece y desaroya bon di salud. Cuido y proteccion di nos muchanan ta un responsabilidad di nos tur. Ban percura pa muchanan na Aruba ta bon vacuna!

 

Pa mas informacion por tuma contacto cu Seccion Cuido Salud Hubenil na 522-4200 of jgz@despa.gov.aw of “LIKE” Directie Volksgezondheid riba Facebook pa keda informa.


Leave a Comment