Brouwerij Balashi ta orguyosamente presenta ‘B Sixty 2’ Limited Brew
Den cuadro cu celebracion di cerbes Balashi su 20 aña di existencia, Aruba su prome Brew Master, Eugene Flanegin, a traha un tremendo producto local cu nos tur por ta orguyoso di dje cla pa subi mercado.
B Sixty 2 ta un creacion di Aruba su prome Brew Master, Eugene Flanegin. E ciencia tras di traha cerbes sigur no ta uno facil y ta rekeri conocemento y experticio halto. Cu sosten di Brouwerij Nacional Balashi, Eugene a embarca den un training intensivo pa bira un Brew Master na Alemania, na unda cu el a siña for di A te cu Z tur loke bo mester sa pa traha cerbes. B Sixty 2 ta un cerbes estilo Lager, cu un bunita color di Amber, consistiendo di 5.0% ALC/VOL. E sabor di e cerbes ta uno suave, cual tin un sabor y aroma dushi na final. Un cerbes cu lo cay na agrado di un y tur.
Inspiracion tras B Sixty 2
Manera e prome Brew Master riba nos isla, Eugene a haya e honor di traha su prome cerbes inspira por medio di e exito y sosten cu el a semper ricibi for di Brouwerij Nacional Balashi.
E letter B den e nomber ta representa Balashi, anto e Sixty 2 (62) ta e adres di e compania.
Aruba henter por spera B Sixty 2 e fin di siman aki riba mercado y lo ta pa un tempo limita, pasobra segun Eugene, e intencion ta pa awor sigui traha mas cerbesnan limita pa Aruba.
“Manera custumber, Aruba por spera un otro cerbes di calidad riba mercado. Den otro palabra, un cerbes cu ora bo beb’e, bo ta haya gana di bebe uno mas anto esey nos ta yama Drinkability beer”, Eugene ta expresa.
Eugene kier a gradici Dios tata pa e bida y salud pa e por a logra tur esaki, su famia henter cu a apoya su persona te na final, sin laga afo un danki grandi na gerencia di Brouwerij Nacional Balashi y tur empleadonan, manera tambe na Metacorp pa e sosten grandi. Eugene ta bisa cu bo futuro ta den bo man. “Nunca bisa cu ta laat pa siña, pasobra ami a pasa den hopi cos duro den mi bida pero mi nunca a perde speransa. Un conseho na nos hendenan cu pa bo logra manera ami bo mester tin disciplina, y bo mester tin gana den logra den bo profesion y den bida”, Eugene ta comenta.
Balashi 62 ‘Limited Brew’ a wordo produci cu un cantidad limita pa un tempo limita y lo ta obtenibel na establecimentonan selecta.
