CURASON

Bon estilo di bida relaciona cu bo curason


Relaciona cu henter luna di september a dedica na curason y pa motibo cu ta celebra dia 29 di september Dia Mundial di Curason Departamento di Salud Publico y IBiSA ta sigui informa publico kico por haci pa yega na bon estilo di bida. Movecion regular, alimentacion balansa y custumber saludabel ta mantene bo curason bon p’e bati mas largo den transcurso di un hende su bida. Hopi ta esunnan cu ta muri tur aña pa motibo di malesa di curason. E cifranan ta alarmante: di cada 3 persona aki na Aruba uno ta muri di curason of pa motibo di malesa circulatorio. Preocupacion pa cuida bo curason mester bira un rutina diario. Ta pa e motibo ey Departamento di Salud Publico y IBiSA ta haci un yamada na tur hende pa nan desaroya custumber saludabel cu ta permiti nan mantene un curason saludabel y biba un bida mas largo y saludabel. Con pa haci esaki? 1. Aumenta e porcion di fruta, berdura y fibra den bo alimentacion; 2. Modera uzo di salo, sucu y vet menos saludabel; 3. Na luga di uza lift, haci uzo di trapi; 4. Parkeer bo auto un tiki mas leu di bo destino; 5. Tuma un break activo; 6. Evita humamento (tabaco); 7. Si bo tin yiu motiv’e pa haci deporte y pa hunga pafo den aire liber. 8. Haci control medico regularmente pa controla presion di sanger, colesterol, triglyceride, peso y midi di cintura. Ta midi cintura na haltura di e lombrishi. E cintura mag di yega te cu 35 inch of 88 cm pa un hende muhe saludabel y te cu 40 inch of 102 cm pa un hende homber saludabel. 9. Sea un bon ehempel di custumber saludabel pa bo yiunan pa asina nan mantene nan curason saludabel. Y como ultimo punto 10. Si bo dokter duna bo un remedi, ta sumamente importante pa bo tuma e remedi fielmente na e orario prescribi y e cantidad prescribi durante e tempo prescribi. Di e manera aki bo por obtene e resultado desea. Pa mas informacion tocante estilo di bida pa evita malesa di curason Like nos Fan Page riba Facebook “Departamento di Salud Publico” y asina keda bon informa. Tambe por yama Departamento di Salud Publico na 522-4200 of IBiSA na 582-4987 pa mas informacion.

Leave a Comment