big joe celebrando bida (3)

Big Joe (The Legend) lo ta organisando e ultimo evento di drag race Celebrando Bida !


E aña aki un biaha mas e team di Big Joe lo ta organisando e ultimo evento di drag race aki na Aruba jama “Palo Marga Finals”. E biaha aki e lo ta e evento di mas grandi cu nan a jega di organisa como cu lo ta un total di 5 dia di evento y esaki lo ta dedica na Ricardo “Cado” Kock celebrando mas di 30 aña den e mundo di Drag Racing. Pero esaki lo bai bira un evento sumamente special como cu December aña pasa e casa di Cado Kock esta Sita Geerman-Kock a wordo diagnostica cu cancer y esey a pone tur hende den e team para un rato keto y refleciona riba e importancia di bida y pa trata y duna aprecio na bo sernan keri ora cu nan ta na bida. Pa es motibo aki henter e tema di Palo Marga Finals di dianan 28 y 29 di November proximo lo bai ta “Celebrando Bida”. Pa prome biaha un evento di drag lo bai ta den combinacion cu Koniging Wilhelmina Kanker Fonds cu tur dia ta duna e support necesario na tur persona cu bati na nan porta paso personalmente of sea un amigo, conocir of famia nos tur conoce un persona den nos boda cu ta sufri di un of otro tipo di cancer. Na Aruba nos tur tin un conocir of famia cu ta sufri di e malesa cancer y e mundo di drag racing no ta un excepcion paso tanto coredornan of fanaticonan tin un persona den nan famia cu ta sufri di e malesa aki. Y ta pa es motibo aki mes Big Joe kier atraves di e deporte di drag concientisa tur hende cu tin un organisacion manera Koniging Wilhelmina Kanker Fonds cu ta para cla pa judabo pero tambe cu e organisacion aki mester di e sosten financiero pa asina por sigui juda mas hende aki na Aruba paso e malesa di cancer no ta discrimina y ta toca na porta di esnan sea directamente of indirectamente involucra den e deporte di drag tambe. Tur esnan cu bai mira e actividad di Palo Marga Finals tambe lo ta contribujendo cu Koniging Wilhelmina Kankerfonds como cu 5 florin di cada ticket di entrada lo bai como donacion pa Koniging Wilhelmina Kanker Fonds pa di e forma aki nan por hanja fondonan necesario pa asina nan por sigui juda e patientnan di cancer cu ta bati tur dia na nan porta. Durante e evento di drag race aki e representantenan di KWKF tambe lo bai ta presente pa prome biaha riba pista di Palo Marga pa asina tur amante di e deporte aki por papia y hanja mas informacion di loque e fundacion ta haci y esnan cu kier duna algo mas di nan curason na e fundacion lo por haci esaki directamente. E actividadnan di Palo Marga Finals mes lo ta cuminsando Diabierna 21 di November cu un tremendo Inschrijving/Car & Bike Show riba e parkinglot di Kooyman di 7or pa 10or di anochi, sigui pa un roadtest na Palo Marga Diasabra dia 22 di November di 7or pa 11or di anochi y e caredanan mes lo tuma lugar Diabierna 28 y Diasabra 29 di November. Pa sera henter e celebracion di bida aki cu broche di oro, entregamento di premio lo tuma lugar Diadomingo 30 di November den un tremendo actividad unda tur coredor y fanatico por bini hunto netjes y sin stress di careda pa tuma nan premio y pa despues sigui cu e reconocimentonan y un celebracion pa “Celebra Bida”, paso manera Cado kock semper a bisa “Reconoce un hende na bida pa e disfruta di dje, paso despues e no sa cu bo a reconoce tog”.