Balashi su Magic Mango ta un cerbes nobo y totalmente diferente pa comunidad di Aruba


Brouwerij Nacional Balashi recientemente a presenta nan cerbes nobo Magic Mango, un edicion limita cual ta hopi dushi y diferente no obtenibel riba mercado.

Marisol Heronimo,e prome Brew Master femenino na Brouwerij Balashi, tin 11 aña trahando den e mundo di cerbes. Di ora cu Marisol a bira Brew Master e tabata sa cu e lo haya e oportunidad pa e saca un cerbes cu su nomber, cual ta un deseo di tur Brew Master pa logra yega na un honor asina. “Mi tabata sa for di comienso cu mi kier haci algo diferente”, Marisol ta expresa.  Pues a bin cu e iniciativa aki di Magic Mango, un fruta obtenibel na Aruba mes y cual Marisol a crece cu ne for di su infancia.

 

Tur aña tabata e mesun storia bibando na Playa, cu un mata grandi di Mango den su cura, na unda cu Mango ta cay riba su dak y lanta Marisol for di soño. “Mainta mi tabata sa mi lo haya yen di Mango tira abao pa come”, Marisol ta bisa. E iniciativa pa traha Magic Mango, un cerbes nobo y diferente, ta pa mustra cu ta posibel y cu no ta semper tur cos mester keda cu e mesun smaak pa e ta un bon cerbes.

 

Esaki ta algo cu Marisol a experiencia na Berlin ora cu el a bay studia pa bira Brew Master, caminda cu tin asina tanto variacion di cerbes y bo ta haya hopi cos cu aroma of sabor di fruta den dje.

 

Edicion Limita

Magic Mango ta un cerbes limita cual lo solamente sali un biaha so y lo sigui despues experimenta cu otronan, pues no tin hopi caha y ta conseha pa bo busca esun di bo lihe pasobra nan ta bay caba hopi lihe.  “E soño di tur hende ta pa traha un cerbes y esaki bira un Line Item manera Balashi of Chill cual ta nifica cu nos ta constantemente trah’e y bend’e”, Marisol ta splica.  Marisol su deseo ta pa Magic Mango bira un Line Item tambe y asina sigui desaroya mas sabor, mas fruta y diferente tipo di cerbes, y esaki ta algo cu Aruba mes ta dicidi. Magic Mango tin henter un otro proceso di traha cual ta diferencia na Balashi y Chill, cu receta totalmente diferente. Esaki ta haci cu tin un otro sentido refrescante, bo no ta yena ora bo bebe varios di dje tras di otro. E ta un cerbes totalmente diferente. “Esaki ta haci e hopi mas excitante pa traha tambe caminda bo ta test bo capacidad manera un Brouwerij, kico tur bo por haci y con leu bo por hiba bo planta. Ta un periodo hopi excitante pa traha an Balashi na momentonan aki”, Marisol ta expresa. Lo bin hopi mas sorpresa y sabornan nobo den futuro. “Nan tin nos ta traha duro akibanda!”, Marisol a expresa chistosamente. E ta algo hopi leuk, Marisol ta agrega, pasobra Balashi ta balora nan opinion, nan ta laga bo tin bo libertad creativo.

Ta gradici henter e team cu a produci e cerbes. Brew Crew, Production, Maintenance, Engineering y Quality Assurance y na mes momento ta invita pueblo di Aruba pa purba e Magic Mango Limited Brew y asina disfruta di algo totalmente nobo pa nos isla. Pa haci pedido ta solamente Online via e webshop di Tropical Bottling Company, Shop.tropicalbottlingcompany.com y haya bo pedido te na porta di bo cas.