Cool FM Aruba Jelitza Genser

Arubian Soul den concierto diamars 1 April na Cas Di Cultura


Cu Aruba tin hopi talentonan musical no ta informacion nobo, mirando e gran cantidad di musiconan cu a toca den carnaval. Pero dicon no uni tur nos talentonan local den un album di colaboracion? Y brinda nan un plataforma adecua manera nos teatro local?
Esey ta lo cual Arubian Soul ta encera. Otro siman diamars dia 1 di April, Cas di Cultura lo host e prome concierto unda tur e musiconan local cu a traha riba e album “Arubian Soul”, produci cu e sosten financiero di Unoca, lo presenta nan cancionnan na publico presente. Por disfruta di un dushi Tumba, Jazz of hasta Son Montuno, mescla cu otro influencianan manera Jazz y Pop.
Ta e intencion cu e album aki haya acogida international pa promove musica Rubiano como un ehemplo di ‘World Music’.
Artistanan famoso como Michelangelo Koolman, conoci pa su cancion exitoso “Mundo ta un Milager”, Martin Buitenweg cu a aregla casi tur e guitara pa e album, Miguel Genser, conoci no solamente pa su bunita voz pero tambe ta e actor principal den e pelicula popular “Abo So” ta djis un par di nombernan presentando nan obra e anochi aki.
Otro musiconan participando ta Ron Martis, cu e cantica “ Mi kier sa’ Jelitza Croes cantando e tumba “ Mihor nos separa”, Chantal Quandt pa e cantica ‘ Un Bon Muhe” y Ruthjean Landaeta Helder hunto cu su casa Rajiv Landaeta lo canta “ Awe te cos” y e wals Antiano“ Aruba ta mi cas”.
Tickets pa e show bunita aki ta obtenibel na Cas di Cultura. Fecha: Diamars dia 1 di April, 8:00-10:00pm.
E album ta obtenibel riba ITunes, na Cas di Cultura dia di e show, na Waf dilanti Royal Plaza, Hopi Bon Grill, Unoca y cerca Michelangelo Koolman.