ARUBA TOURISM AUTHORITY HUNTO CU AHATA y AAA TA ORGANISA E CONFERENCIA ‘ARUBA MEETS EUROPE 2018’


E siman aki ta tumando luga e evento/conferencia bi-annual Aruba Meets Europe (AME) organisa door di Aruba Tourism Authority (A.T.A.), Aruba Hotel and Tourism Association (AHATA) y Aruba Airport Authority (AAA).

 

E conferencia interactivo aki lo consisti cu participacion di tour operators, representantenan di aerolineanan, hoteleronan y representantenan di Aruba den e mercado, tur dedica na e promocion di e isla como un destinacion di vakantie na Europa. E aña aki, mas cu 55 diferente persona di diferente pais ta participa.

 

E obhetivo principal di AME ta pa percura e industria cu e ultimo update riba Aruba su productonan y desaroyo, como tambe duna oportunidad na esnan cu ta participa pa prome biaha, pa duna un introduccion na nos destinacion na un manera interactivo.

 

Manera menciona caba, AME 2018 ta wordo organisa door di Aruba Tourism Authority (A.T.A.), den colaboracion cu AHATA, AAA y partnernan local.

 

Paisnan cu ta participa e aña aki ta Hulanda, Belgica, Alemania, Italia, Finlandia, Dinamarca, Irlanda, Inglatera, Polonia,  Suecia, España y tambe Corsou.

 

E conferencia ta inicia cu un recepcion di bonbini dialuna anochi, unda Minister President Sra. Evelyn Croes-Wever, Minister di Turismo Sr. Danguillaume Oduber, y CEO di A.T.A. Ronella Tjin Asjoe-Croes lo hiba palabra di bonbini. Diamars mainta ta sigui cu e apertura oficial unda lo bay tin diferente presentacion di A.T.A., AHATA Y AAA.

AME ta tuma luga te cu dia 20 di april cu programa amplio y interesante compila pa e participantenan, na unda a planea varios reunion y actividad pa fortalece e lazonan profesional.

 

Ta bay tin e acustumbrado Vitrina Turistico na unda e participantenan lo conoce y papia cu ehecutivonan local den turismo pa asina haci negoshi y crea/fortalece relacionnan duradero. Ademas durante nan estadia nan lo bishita varios hotel.

 

Riba potret por mira participantenan di e ultimo AME cu a tuma luga na 2016.

 


Leave a Comment