E biñanan di alta calidad di Wente Vineyards Family Estates, representa riba e isla pa Arion Wine Company, a forma parti di un purbamento di biña unico cu a wordo organisa recientemente, cu presencia di Eric Wente, kende ta dirigi e compania su operacion diverso cu un estilo envolvi, cual e ta comparti cu su rumannan Carolyn y Philip.
Eric a bishita Aruba na un cantidad di ocasion den pasado, ofreciendo torneonan di golf caritativo y conduciendo seminarionan di biña. Sinembargo, e biaha aki, el a opta pa laga e scenario pa su yiu homber, Karl D. Wente, kende ta un productor di biña di e di cinco generacion, Senior Vice-Presidente di Produccion di Biña y responsabel pa tur produccion di biña na Wente Vineyards. De hecho, 2013 lo ta Karl su di 14 produccion di biña y e di 12 produccion na Wente Vineyards, trahando cu e biñeronan cu a crece denter di e famia su portofolio.
E purbamento dene Hyatt Regency ballroom a compara e compania su tres biñanan famoso di Chardonnay cu otro. Sirbi personalmente pa Eric Wente, e invitadonan a purba Wente Vineyards Morning Fog Chardonnay, Livermore Valley 2012, Riva Ranch Chardonnay, Arroyo Seco Monterey 2012 y The Nth Degree Chardonnay, Livermore Valley 2010. Tur e biñanan aki ta traha di druif cu a wordo cosecha riba e famia su biñeronan di 3,000 acre, cu ta wordo opera na un manera sostenibel na California, net oost di San Francisco den e regionnan historico di Livermore Valley y Monterey.
Papiando via Skype cu e hoteleronan y restaurateurs local invita, Karl a comparti anecdotanan historico, ademas di informacion importante tocante e biñanan, guiando e purbamento den su estilo casual, dibertido y sumamente original y personal. El a hasta ofrece pa toca su guitara na final di su presentacion, agregando un toke dibertido adicional na e evento.
E invitadonan tambe a purba tres di e compania su biñanan di Cabernet Sauvignon for di e Livermore Valley, comparando nan cu otro, purbando e Southern Hills Cabernet Sauvignon 2011, Charles Wetmore Cabernet Sauvignon 2011 y The Nth Degree Cabernet Sauvignon 2010.
Joost Röben hunto cu e departamento di mercadeo di Arion Wine Company a pidi pa tur hende hisa nan man pa vota, y nan a descubri cu e sala tabata igualmente dividi entre esnan cu a prefera tur tres Chardonnay, y esnan cu a prefera tur tres Cabernet, confirmando e hecho cu biña ta un escohencia personal, y cu e productornan di biña mester crea diferente estilonan di biña pa asina nan por satisface paladarnan individual.
E invitadonan a expresa hopi interes den e compania su biñanan di Nth Degree, cual ta un liña di biña traha na man, di produccion limita, mustrando estilo y clase di un grado estelar.
Como un conclusion di e evento tan disfruta, e Murrieta’s Well, The Spur 2011, parti di nan portofolio, tambe a wordo purba. El a demostra e arte di mesclamento, combinando e miho cu e biñero tin pa ofrece pa asina crea un mescla sumamente interesante y delicioso di biña cora, cual e grupo a describi como atractivo, aromatico y yen di sabor.
California su biñero mas bieu opera pa famia y continuamente opera, Wente Vineyards awendia ta wordo maneha pa e di cuater y e di cinco generacionnan di famia Wente, marcando su di 131 aniversario. Combinando practicanan tradicional y inovativo di traha biña, e biñero ta mantene su rol di liderasgo entre e comunidad di biñero na California, produciendo un portofolio excelente di biña di alta calidad.
Prome cu el a conclui su presentacion via Skype, Karl a invita su publico Arubiano pa bishita Wente Vineyards, reconoci como un di e top destinacionnan den e region di produci biña na California, ofreciendo purbamentonan di biña, cuminda gourmet, y golf riba un nivel di campeonato.
“Biña di California y e estilo di bida di e area productor di biña na California ta reconoci y aprecia rond di mundo,” segun e Productor di Biña di e di Cuater Generacion, Eric Wente. “Nos famia ta dedica na crea biñanan superbo, produci na un manera sostenibel y cu prijsnan rasonabel, y mi ta viaha rond di mundo pa conoce y papia cu nos clientenan, pa asina duna nan e mensahe aki.”
Aki por mira algun momento di un purbamento inolvidabel.
