Aruba College Fair Foundation ta anuncia cu diabierna y diasabra, 13 y 14 di november lo tin pa prome biaha e Aruba Virtual College Fair. Semper e college fair tawata den persona pero pa rason di e pandemia, un otro solucion mester a wordo busca pa toch brinda e studiantenan e informacion importante cu nan mester pa tuma decision. Participacion ta gratis pa tur studiante.
E Feria lo tuma luga di 8AM pa 8PM. Presente lo tin colleges y universidadnan conoci pero e pandemia a trese oportunidadnan nobo pa scolnan cu antes no lo nunca por a bin Aruba. Esaki ta un desaroyo toch positivo y a trese mas variacion pa nos studiantenan.
Pa un lista completo di cua scolnan lo ta presente, studiantenan por bishita nos website: arubacollegefair.com. Pero tin representacion di e siguiente paisnan aki: Aruba, Abu Dhabi, Barbados, België, Canada, Merca, Panama, Spaña, Swisa,
Pa participa, studiantenan mester registra y sign up pa e sessionnan/presentacion di e scolnan ta ofrece riba e plataforma virtual. Scolnan na Europa lo tin sessionnan primordialmente parti mainta y scolnan den nos region, lo tin sessionnan henter dia.
Nos ta invita y urgi tur studiante pa probecha di e oportunidad cu ta wordo brinda na nan pa nan por haya e informacion di estudionan, costonan, procedura di aplicacion y otro informacion valioso cu nan mester. Tambe lo tin presentacion di oficialnan gubernamental di Merca y Canada relaciona cu aplicacion pa visa di studiante pa e paisnan aki.
Deadline pa studiantenan registra pa participacion na e Feria ta dialuna, 10 di november. Studiantenan por registra via nos website: arubacollegefair.com y klik riba Student Registration y sigui instruccionnan di registracion. Ta importante pa e studiante sign up pa e sessionnan tambe sino e lo yega e plataforma sin session pa drenta.
Aruba Virtual College Fair 2020 ta warda tur studiante pa e oportunidad aki!