Aruba Beach Tennis Open 2019: 1 november ultimo dia pa inscribi


Preparacionnan ta andando. Si pasa banda di Bushiri, lo bo tuma nota cu ya a cuminsa cu set up di diferente aspecto pa cu e evento deportivo mas grandi cu ta tuma lugar na Aruba. E evento number 1 di mundo pa loke ta e deporte di Beach Tennis. Nos ta referi na e Aruba Beach Tennis Open 2019.

Entre 9 y 17 di november, mas cu 1000 deportista den e deporte di Beach Tennis lo ta participando den diferente categoria. Mirando cu a hiba e evento na un sitio cu por a aloca mas veld, e organisacion a opta pa amplia e programa y a agrega mas dia aserca. Normal ta conta cu un total di 7 dia, pero e aña aki e weganan lo cuminsa desde diasabra 9 november te cu diadomingo 17 november, dus un total di 9 dia.

Lo ta bai tin mas cu 40 veld, mas cu 1500 participante, 35 diferente nacionalidad y $70,000 na premio. Ya por confirma cu e campeon nan di 2018 lo ta presente pa defende nan titulo.

Un evento cu no mester mas di introduccion, sino unicamente ta hasi invitacion na henter pueblo di Aruba pa bin presencia e evento. Bin apoya nos deportista localnan, cual ta hopi ta participa. Un recordatorio tambe ta bai pa esnan cu ainda no a inscribi, pa hasi esaki prome cu dia 1 november ya cu esaki ta e ultimo dia pa por registra. Debi cu ta un torneo cu ta wordo coordina y monitorea pa International Tennis Federation (ITF), mester sigi cu regla nan stipula mundialmente.

Pa mas informacion por bishita nos website www.arubabeachtennisopen.com, eyriba ta haña tur informacion necesario y inscribi pa segura bo participacion.