Kiwanis Club of San Nicolas (“KCSN”) a tene su “K-Pop Up Beach Wear Fundraising Sale”


San Nicolas, 10 november, 2020: Dia 24 & 31 di oktober, Kiwanis Club of San Nicolas (“KCSN”) a tene su “K-Pop Up Beach Wear Fundraising Sale”. Un danki grandi na Joel Raijnherc & famia kende a hasi e donacion di e inventario di beach wear cu asina nos por a bende pa recauda fondo pa sigi cu nos proyecto nan planea pa 2020 & 2021.

KCSN kier gradisi tur esnan cu a cumpra y asina contribui bek na nos comunidad. Nos a logra recauda mas di AWG 5.300,- cu lo yuda nos ehecuta e.o. nos proyecto pa fin di anja pa duna bek na nos muchanan. Keda pendiente pa e proyecto aki y e sorpresa pa nos muchanan!

Durante e benta aki, nos a haya ayudo di YMCA San Nicolas como tambe di 6 hobencita cu a dedica nan tempo y a siña di duna bek na nos comunidad.

Ta di remarca cu dia 24 di oktober tur Kiwanis Clubs rond di mundo a participa den “Kiwanis One Day”. Un dia pa aña unda tur Kiwanis Clubs ta activo den comunidad. Kiwanis Club of San Nicolas no a keda afor! Nos di KCSN a disidi di planta e simia den nos muchanan con pa sirbi nos comunidad, y asina nos a verf & planta 50 pot di mata di fruta y berdura pa reparti na nos “frontliners” di San Nicolas y vecindario. Esaki como un gesto di aprecio na nan dedicacion y como motivacion den e temporada difícil aki.

E intencion pa nos proyecto nan ta pa enfoca riba diferente topico di desaroyo personal di nos muchanan pa asina nos forma futuro lider den nos comunidad.

Kiwanis Club of San Nicolas kier a extende un palabra di agradecimento na tur boluntario cu a aporta pa hasi e dos dia nan aki posibel. Nos ta invita pueblo completo pa follow nos riba nos Facebook page y asina keda pendiente di nos proyecto nan pa fin di aña.


Leave a Comment